Dispués de prou estudiá
pa está ben preparáu
el esamen voy a fe
pa ganame el aprobáu.

Ya fa días que no dixo
de mirame ni un momento
ixos apuntes que están
matanme d´aburrimiento,
pos tanto leé lo mismo
maitinos, tardes y noches
ya te fa perdé el oremus;
y cudiau que no t´esboches.

La hora ya ha llegáu,
esto ya no tiene cura.

En fila hen iu entrán
en la sala de tortura.

He cogíu cinco u seis hojas
y m´he sentáu a la mesa
esperán que el maestro,
que lleva la pata tiesa,
mos reparta las preguntas
pa podé i contestán
cada uno lo que sepa,
y el que no que tire aván.

En la pizarra d´enfrente
ha posáu con un clairón
a qué hora hen de acabá,
pa no fe el remolón.

Ya están aquí las custións
que n´hay que i respondén.

No paecen compllicadas;
pos tranquilos, irén fen,
que no n´hay que atabalase
ni perdé la compostura.

Si uno se´l toma con calma
aproba la asignatura.

Lo primero que me dicen
no acabo ben d´entendelo;
quieren sabé el perqué
la Lluna chira pe´l cielo,
perqué la Tierra é redonda,
perqué no está el Sol de noche
y de an sale tanta estrella,
que en hay a troche y moche.

Cosa imposiblle resulta
el sabé ben lo que pasa
per ixe cielo que toz
tenín encima de casa.

No sabén ben lo primero
de lo compllicáu que é
pasaré a lo segundo
a ve si esto ya´l sé fe,
que tapoco pasa nada
per dixá de contestá
bella de estas custións
que m´acaban de planteá.

Tiengo que diles ahora
con la mayor precisión
pa qué vale y qué é ixo
que llaman el electrón.

Prou mal camino i llevo
con la segunda custión,
pos lo único que sé
é que é prou chicorrón,
precisamente per ixo,
per lo prou chicó que é,
que n´hay que cogé un cacharro
pa i podelo veyé.

Pasaré a la tercera
a ve si me va milló.

Las dos d´antes son tan raras
que no las sé fe ni yo.

Ahora les he de espllicá
qué cosa va más aprisa,
si la llumbre de las velas
o el rudio de la chen en misa.

¡Qué manera compllicamos
con tamaña tesitura!

Esto no n´hay qui´l conteste;
ni el que´l pregunta ni el cura.

Pos sí que la farén güena
como esto siga así;
con la marcha que i llevo
no tendré ni que escribí,
perque me n´estoy dan cuenta
así a primera vista
que pa las custións que faltan
tendrán que da bella pista,
pos con estas ecuacións
no se´n puede da salida.

Pa entendé qué quieren di
necesito to la vida.

Aquí está to´l esamen,
ya me´l he leíu entero.

Pormedián p´encima encima
no creigo que pase del cero.

Y pensá que fa semanas
que no salgo per astí
a ligá con las zagalas
pa podeme divertí
per está metíu en casa
estudián a to meté.

Y pensá dispués de esto
que me van a suspendé.

¡Y cuántos fins de semana
que he desaprovecháu!

Al menos a´l que no estudia
que le furten lo bailáu,
pos onque tamé suspende
per no sabé la leción,
ixe se ha divertíu,
y más si é bel ligón.

Como esto ya está visto
que no tiene solución
me´n voy a i enta casa,
pos chuflán bella canción,
que pa meteme morrudo
tiempo n´hay de aquí enta aván,
que faltan aún prous esamens
como pa empezá pllorán.

Como a algunos de vusatros
tamé tos puede pasá
pos bella cosa de las que
tos acabo de contá
tos daré un güen consejo
que acabo de aprendé:
no i dixez mai la juerga
ni la choldrá ni el bebé
per metetos a estudiá
onque los libros tos llamen,
pos ixo no asegura
que aprovez el esamen.