Yo estoy aquí en casa,
aquí voy y viengo,
cudio de lo mío
y foi lo que quiero,
treballo maitinos
si no fa prou fresco
y tardes templladas
que caigo pe´l güerto,
más llega un home
que me coge preso,
me ata cadenas
y ramals al pecho,
me carga, me sube,
me lleva, yo quieto,
y al cabo los días
ya están en el pueblo,
los bllancos sentáus,
achocaus los negros,
no vale aquí guaire
sé choven u viejo,
y no tiengo fame
ni tapoco sueño,
sólo tiengo ganas
d´escapá del pueblo,
de torná a sé libre
per allí de an viengo,
pero el home malo
me ata más fierro
pa que no me escape
de el suyo pueblo,
y me manda esto
y tamé aquello,
llábrame esta faixa,
sácame este fiemo,
recorda las güellas,
da de comé al berro,
y de mientras yo
que plloro en silencio
anda que un güen día
llega un mensajero
que trae la nueva
que yo tanto espero,
que a partí d´entonces,
de ixe momento,
no n´habrá ya esclavo
ni amo ni dueño,
y ya tiengo fame
y un poqué de sueño,
y unas ganas llocas
de brincá del pueblo,
pero veigo al home
que se queda drecho
mientras yo ya marcho
enta´l mío puesto,
y el miro con rabia
pero sin desprecio,
pos no sabe él guaire
de los sentimientos
de las chens del mundo,
de bllancos y negros,
pos é un inorante
home sin talento,
que me da prou pena,
compasión y miedo,
pos no sabe él guaire
del divertimento
de viví toz libres,
iguals y sin dueños,
ayudanmos toz
en lo malo y güeno,
querinmos en algo,
un poquet al menos,
y a lo que me chiro
veigo a lo lejos
cómo el home malo
ya se torna güeno
dispués de leeme
con el pensamiento
lo que tos acabo
de di en estos versos,
y él me se mira
con un aire nuevo,
con un algo estraño
que yo ya comprendo,
y sin dime guaire
allí yo ya siento
cómo se trasforma
to el universo
con algo tan simple
y a la vez concreto
como que uno malo
el dixe de selo
y sin sabé cómo
se i torne en güeno,
y de esta forma
ya salgo del pueblo
con la cara alta,
tranquilo y sereno,
pensán que en el fondo
lo malo y lo güeno
sólo son dos caras
del entendimiento,
al igual que un crío
necesita tiempo
pa podé aprendé
y llegá a sé agüelo.
Asinas la chen
puede aprendé a selo,
aprendé a sé malo
o aprendé a sé güeno.